Бишкекте экинчи жолу эл аралык “Наристе” балдар фольклордук фестивалы өтөт

Бишкекте экинчи жолу эл аралык “Наристе” балдар фольклордук фестивалы өтөт. Бул тууралуу мэриянын басма сөз кызматынан билдиришти.

Маалыматка ылайык, 30-майдан 8-июнга чейин Бишкекте “Наристе” II Эл аралык балдардын фольклордук фестивалы өтөт.

Кеңири масштабдагы иш-чарага Орусия, Казакстан, Монголиядан келген өкүлдөр, ошондой эле Кыргызстандын 7 облусунан балдар фольклордук топтору катышат.

Фестивалдын негизги максаты – Кыргызстандын салттуу элдик маданиятын сактоо жана өнүктүрүү, ошондой эле башка өлкөлөрдүн элдик искусствосу менен тааныштыруу. Иш-чаранын алкагында республиканын жана чакырылган өлкөлөрдүн ар кандай балдар фольклордук бий жана аспаптык ансамблдеринин өнөрлөрү тартууланат.

Мастер-класстар, ачык асман алдындагы ачык сабактар уюштурулат. Ар кандай чыгармачылык жолугушуулар жана кечелер, илимий-практикалык конференциялар, элдик прикладдык искусствонун көргөзмөлөрү, маданият жана прикладдык искусство тармагындагы инновациялык долбоорлордун бет ачары, шаардын тарыхый-маданий жерлерине экскурсиялар, Ысык-Көл жана анын тарыхый объектилери менен таанышуу пландаштырылууда.

Бүгүн, 31-майда Т.Сатылганов атындагы Улуттук филармониянын чоң залында өтүүчү расмий ачылышында Казакстандан, Монголиядан, Орусиядан, Алтай Республикасынан, Тува Республикасынан, Санкт-Петербург шаарынан келген командалардын жаркын оюну тартууланат жана албетте, биздин командалар өздөрүн кеңири тааныштырышат.

Автор: Алина Айдарбекова