Америкалык актёр Жонни Депп Эмбер Хёрдду сотто жеңип чыкты

Америкалык актёр Жонни Депп мурдагы жубайы Эмбер Хёрдду сотто жеңип чыкты. Бул тууралуу чет элдик басылмалар жазып чыгышты.

Маалыматка ылайык, АКШнын Виржиния штатында сот актриса Эмбер Хёрдду мурдагы жолдошу Депптин ар-намысын жана кадыр-баркын коргоо боюнча доо арызында анын аброюна шек келтиргени үчүн күнөөлүү деп тапты.

Сот Жонни Деппти колдоп, ага 15 миллион доллар сыйлык берген.

"Сонная лощина", Чарли жана шоколад фабрикасы", "Донни Браско", "Кариб деңизинин каракчылары" франшизасы жана башка көптөгөн тасмалардан кийин кеңири популярдуулукка ээ болгон 58 жаштагы Жонни Депп мурдагы жубайы 50 миллион доллар кенемте төлөсүн деген доо арыз менен сотко кайрылган. Ал мурдагы аялы ага жалаа жаап, аны физикалык жана сексуалдык зомбулукка айыптап, өзүн ушундай кордуктун курмандыгы катары гана эмес, үй-бүлөлүк зомбулукка каршы күрөшкөн коомдук ишмер катары көрсөткөнүн билдирген.

Ал эми 36 жаштагы Хёрд Депптин жактоочусу "Daily Mail" гезитиндеги макаласында актрисанын аброюна шек келтиргенин айтып, мурдагы жолдошунан 100 миллион доллар талап кылып, сотко кайрылган. Эмбер Хёрддун бул талабы жарым-жартылай канааттандырылып, сот ага 2 миллион доллар өлчөмүндө компенсация төлөп берүүнү чечкен.

Америкалык телеканал аркылуу көрсөтүлгөн бул резонанстуу сот жараянында Эмбер Хёрд Деппти бир нече зордук-зомбулук аракеттери үчүн айыптаган, бирок алардын бирине да ынанымдуу далил келтире алган эмес.

Анын үстүнө Жонни Депптин жактоочулары сотко Эмбер Хёрддун күйөөсүнө физикалык зомбулук көрсөткөнүн тастыктаган аудио жазууларды көрсөтүшкөн.

Жонни Депптин адвокаттары сотто Эмбер Хёрддун жалган жалаалары Жонни Депптин карьерасын талкалап салганын, атап айтканда, анын "Кариб деңизинин каракчылары" тасмасында роль жаратпай калганын айтып чыгышкан.

Белгилей кетсек, дүйнө жылдыздарынын соту 2016-жылдан бери улам жылып отуруп, чечим чыкпай келген.

Автор: Алина Айдарбекова