Баткенде жүргөн сел бир нече үйдүн огородун каптап, көпүрөлөрдү зыянга учуратты

Баткен облусунун Кадамжай районунда сел жүрдү. Бул тууралуу Өзгөчө кырдаалдар министрлигинин басма сөз кызматынан билдиришти.

Маалыматка ылайык, кечээ, 15-июнда кыска мөөнөттө жаап өткөн жаандан Кадамжай районунун Охна, Бел айылдарында сел өтүүчү сайынан сел жүргөн.

Охна сайынан жүргөн сел Орозбеков айыл өкмөтүнүн Учкун, Бостон, Кара-Кечүү, Больничная, Жоогесек-Коргон участкаларындагы бетон шакекче менен курулган 7 көпүрөнүн кум-шагылдарын бузуп кеткен.

Ошондой эле Кадамжай-Айдаркен жолундагы унаалар өтүүчү көпүрөнүн жээги, ички чарбалык жолдун 1100 метр аралыгы жана Күлдү, Кош-Дөбө айылдарындагы сел жүрүүчү сайдын жээгинен 700 метр, Пүшкөүт сайынын 400 метр аралыгы зыянга учураган.

Ирилеш айылында 5 турак жайдын огородуна жана 1 турак үйдүн жер төлөсүнө сел суулары кирген.

Кошумча маалымат берилет.

Автор: Алина Айдарбекова
Фото: ӨКМнын басма сөз кызматы