Мадина шаарчасында балдарга оюн аянтчасы курулат

Бүгүн, 16-июнда медиа өкүлдөрү Баткен облусунун Мадина шаарчасында болушту. Анда президенттин Баткендеги ыйгарым укуктуу өкүлү Абдикарим Алимбаев, Баткен шаарынын мэри, айыл өкмөт башчылары маалымат беришти.

Облус башчысы шаарчага тигүү цехи курулуп, келиндер иш менен камсыз болорун белгиледи.

"36 үй-бүлөнүн ар бирине 1 миллион сомдон кенемте төлөнгөн. Андан тышкары чек ара чырында атасы өтүп кеткен үй-бүлөнүн 18 жашка чыга элек ар бир баласына 3 миң 700 сомдон жөлөк пул берилет", - деди президенттин өкүлү.

Ал эми Баткен шаарынын мэри шаарчанын бош аймагына балдар үчүн оюн аянты куруларын кошумчалады.

Маалымат үчүн:

2021-жылдын апрель айынын аягында кыргыз-тажик чек арасында орун алган куралдуу кагылышууда 36 Кыргыз жараны каза болгон. Алардын үй-бүлөсүн турак жай менен камсыз кылуу максатында Баткен шаарынын мэриясы тарабынан 5 гектар жер тилкеси бөлүнгөн.

Курулуш иштери 2021-жылдын май айында башталып, ошол эле жылдын 16-сентябрында чек ара окуясында шейит болгондордун жакындарына турак жайларды тапшыруу аземи болгон. Курман болгондор үчүн турак жай курулган жаңы шаарчага окуяда каза болгон өспүрүм кыз Мадинанын аты ыйгарылган.

Автор: Бактыгүл Момбекова
Фото: Бактыгүл Момбекова