Эттин баасы канча сомго кымбаттады? Базардагы баалар (сүрөт)

Бишкектин базарларында эттин дүң баасы көтөрүлдү. Буга байланыштуу эттин базардагы бааларына кызыгып, "Ош базарында" эт саткан соодагерлерди кепке тарттык.

Алардын айтымында, акыркы жумада уй жана жылкы этинин дүң баасы 35-50 сомго кымбаттаган.

"Мурда уйдун этин 400 сомдон сатчубуз. Азыр 450-470 сомго чыкты. Айрым жерлерде 500-550 сомдон болуп жатыптыр. Ал эми жылкынын эти 35 сомго кымбаттады, учурда килограммы 460-480 сомдон сатылып жатат. Койдун эти мурунку эле баада, 500-550 сомдон болуп жатат.

Мал эти Өзбекстанга экспорттолуп жатыптыр, мындан улам эт кымбаттап жатат. Бийлик башындагылар бул маселени чечип беришсе жакшы болот эле", - деп билдиришти соодагерлер.

Автор: Айпери Бакталбек кызы
Фото: Каныкей Амантаева