Эртең Чүй кең көчөсүнүн бир бөлүгү убактылуу жабык болот

Эртең, 1-июлда Чүй кең көчөсүнүн Панфиловдон Эркиндик бульварына чейинки бөлүгү убактылуу жабык болот. Бул тууралуу калаа мэриясынан маалымдашты.

Мындай чектөө "Ала-Тоо" аянтында боло турган Салык кызматынын "Чек талап кылып, байге утуп ал!" иш-чарасына байланыштуу киргизилген.

"1-июль күнү саат 17:00дөн 00:00гө чейин Чүй кең көчөсүнүн Панфиловдон Эркиндик бульварына чейинки бөлүгүндө жол тосулат", - дешти мэриядан.

Белгилесек, Салык кызматынын "Чек талап кылып, байге утуп ал!" лотереясынын биринчи утушу 1-июлда өткөрүлөт. Лотереянын катышуучуларынын арасында баалуу байгелер, анын ичинде 2 унаа, 10 iPhone, 10 смартфон, 25 даана ар кандай тиричилик техникасы ойнотулат.

Иш-чара саат 18:00дө "Ала-Тоо" аянтында орун алып, министрлер кабинетинин төрагасы Акылбек Жапаров катышат.

Автор: Айжанар Рыспек кызы
Фото: Интернеттен алынды