Жалал-Абадда 35 адам ууланган тез татым жайы жабылды

Жалал-Абад шаарында 35 адам ууланган “Ага-ини” тез татым жайына айып пул салынып, ишмердүүлүгү токтотулду. Бул тууралуу шаардык мэриянын маалымат борборунан билдиришти.

Маалыматка ылайык, 35 тургун 27-июнда шаардагы “Ага-ини” тез татым жайынан тамактанган. Аталган окуядан кийин Жалал-Абад район аралык оорулардын алдын алуу жана мамлекеттик санитардык-эпидемиологиялык көзөмөлдөө борбору тарабынан аталган тез татым жайы жабылып, 7 миң 500 сом айып салынды.

Бүгүн, 30-июнда вице-мэр Гүлбарчын Таштанбекова тиешелүү мекеме-ишканалардын адистери менен аталган окуяга байланыштуу жыйын өткөрдү. Анда аба ырайы кескин жогорулап жаткандыктан шаардагы тез татым, бат бузулуучу эт, сүт азыктарын, жер-жемиштерди көзөмөлгө алып, тез арада рейддерди өткөрүү боюнча тапшырма берилди.

Эскерте кетсек, “Ага-ини” тез татым жайынан 35 адам ууланган. Учурда алардын 27си облустук оорукананын жугуштуу оорулар бөлүмүндө дарыланып жатат. Дарыгерлердин айтымында, бардык бейтаптардын абалы туруктуу.

Автор: Айжанар Рыспек кызы
Фото: Жалал-Абад мэриясы