Унаанын терезесинен белинен жогору бөлүгүн чыгарып алган жүргүнчү кызга айып салынды

Кайгуул кызматы жүрүп бара жаткан унаанын терезесинен белинен жогору жагын чыгарып алган жүргүнчү кызга миң сом айып салды. Бул тууралуу милициянын кайгуул кызматынан билдиришти.

Маалыматка ылайык, социалдык тармактарда Чолпон-Ата шаарында жүрүп бара жаткан Lexus ES350 үлгүсүндөгү унаанын терезесинен белинен жогору бөлүгүн сыртка чыгарып алган кыздын видеосу жарыяланган.

"Чолпон-Ата шаарында жүргөн милициянын кайгуул кызматкерлери видеодогу жүргүнчү кызды таап, тийиштүү протокол толтуруп, 1000 сом айып салышты", - деп жазылат маалыматта.

Ошондой эле жүргүнчү кызга мындай жорук өзүнүн жана башканын өмүрүнө коркунуч алып келери, коомдук тартипти бузуу болуп саналары эскертилип, түшүндүрүү иштери жүргүзүлгөнү айтылат.