Ысык-Көлдө көлгө чөгүп бара жаткан 2 кызды аскер базасынын кызматкерлери сактап калды

Ысык-Көл облусунда көлгө чөгүп бара жаткан кыздардын өмүрүн аскер базасынын кызматкерлери сактап калышты. Бул тууралуу ӨКМнын басма сөз кызматынан билдиришти.

Маалыматка ылайык, Жети-Өгүз районунун Липенка айыл аймагынын Кой-Сары тилкесинде эки кыз көлгө чөгүп жаткандыгы тууралуу маалымат түшкөн.

Аталган аймакка Каракол шаарынан 3 куткаруучу тартылган. Ал арада куткаруучулар жерине жеткиче райондун Кой-Сары аскер базасынын кызматкерлери чөгүп бара жаткан кыздарды катер менен сүзүп барып, өмүрүн сактап кала алышкан.

Алар көл жээгине чыгарылган эки кызды ӨКМнын куткаруучуларына өткөрүп беришкен. Андан соң куткаруучулар Жети-Өгүз менен Липенка айылынын кесилишине чейин алып келип, медицина кызматкерлерине өткөрүп беришкен.

Алдын ала маалымат боюнча, кыздардын абалы оор. Алар 22 жашта.

Автор: Айсалкын Качкынбекова