Кыргызстандык окуучу Балкан математикалык олимпиадасында күмүш медалга ээ болду

Бишкектеги №61 мектеп-лицейинин окуучусу Фёдор Корнияш өспүрүмдөр арасындагы XXVI Балкан математикалык олимпиадасында күмүш медалга ээ болду. Бул тууралуу Билим берүү жана илим министрлигинин басма сөз кызматынан билдиришти.

Маалыматка ылайык, олимпиада 28-июндан 3-июлга чейинки аралыкта Босния жана Герцеговинанын Сараево шаарында өтүп, ага 18 өлкөдөн 108 окуучу катышты.

Кыргызстандын командасы өспүрүмдөр арасындагы Балкан математикалык олимпиадасына биринчи жолу катышып, команданын курамына төмөндөгү окуучулар кирди:

Фёдор Корнияш - Е.Б.Якир атындагы автордук физика-математикалык №61 мектеп-лицей;
Абдумалик Турсунов - Келечек-MIT;
Сейит Рыскулов - Газпром-Кыргызстан мектеби;
Нурсултан Эшперов - Газпром-Кыргызстан мектеби.

Окуучуларды олимпиадага математика мугалими Мамат Ишматов даярдаган.

Автор: Бек Оморбеков