Ысык-Көлдө түнкүсүн эс алуу жайларында жүргөн өспүрүмдөр аныкталып, айып салынды

Ысык-Көлдүн курорттук аймагында "Өспүрүм-түн" аталышындагы рейд өткөрүлдү. Бул тууралуу Ысык-Көл ОИИБинен билдиришти.

Маалыматка ылайык, аталган иш-чара түн ичинде ата-энесинин же мыйзамдуу өкүлдөрүнүн коштоосу жок жүргөн балдарды аныктоо максатында уюштурулган. Профилактикалык рейд негизинен курорттук аймактарда жайкысын түнкү оюн-зоок мекемелери иштеген жайларда өттү.

3 күндүк рейддин жүрүшүндө өспүрүмдөр түнкүсүн көп чогулчу компьютердик салондор, түнкү клубдар, кафелер, дискотекалар, сейил бактар жана скверлер сыяктуу жайлар текшерилди. Натыйжада ата-энесинин же мыйзамдуу өкүлдөрүнүн коштоосу жок жүргөн 12 бала аныкталган. Дайынсыз жоголгон 2 бала табылып, ата-энелерине кайтарылып берилди.

Рейддин жыйынтыгында 5 протокол түзүлүп, ата-энелердин ар бирине 1000 сом өлчөмүндө айып пул салынды.
Башка аныкталган фактылар боюнча материалдар Кыргыз Республикасынын мыйзамдарына ылайык чараларды көрүү үчүн башка мамлекеттик органдарга өткөрүлүп берилген.

Автор: Алина Айдарбекова