Жети-Өгүздө суу нугунан ашып унаа жолду каптады

Кечээ, 26-июлда Ысык-Көл облусунун Жети-Өгүз районунда Көк-Жайык жайлоосуна кеткен жолдо суу нугунан ашып, унаа жолду каптады. Бул тууралуу ӨКМдан билдиришти.

Маалыматка ылайык, болжол менен саат 16:27де Жети-Өгүз айыл аймагынын Көк-Жайык жайлоосуна каттаган жолдо суу нугунан ашып, биринчи жана төртүнчү көпүрөнү, жолду каптаган.

Табигый кубулуш катталган дарекке Жети-Өгүз райондук ӨКБнүн ыкчам тобу менен биргеликте Жети-Өгүз айыл өкмөт башчысы, №35 жол тейлөө мекемесинин адиси жайлоодон түшүп келе жаткан унааларды көзөмөлдөп, өткөрүшкөн.

Алар суу каптап кеткен жолго таштарды тизип, эс алуучулардын коопсуздугун көзөмөлдөшкөн. Учурда жолго нөөмөт уюштурулуп, жолдон ары-бери өткөн жүргүнчүлөрдү, эс алуучуларды айланма жол менен коопсуз өткөрүшүүдө.

Ошондой эле жүргүнчүлөргө кооптуулук жараткан эски көпүрөлөрдү жаңы жасоого, оңдоо иштерине байланыштуу жолду жабуу чечими кабыл алынып, райондук администрация жетекчилиги тарабынан тескеме даярдалууда.

Учурда жол тейлөө мекемеси иштеп, жол убактылуу жабык.