Балыкчыда көлгө чөгүп кетти делген кишини издегени барган куткаруучулар 16 жаштагы кызды куткарды

Балыкчы шаарында шамалдын кесепетинен көлдө кайыкта калып калган 16 жаштагы кыз куткарылды. Бул тууралуу Өзгөчө кырдаалдар министрлигинин басма сөз кызматы билдирди.

Билдирүүгө ылайык, министрликке Балыкчыдагы "Алия" мейманканасынын тушунда көлгө 1 киши чөгүп кеткендиги тууралуу маалымат түшкөн. Жерине 3 куткаруучу тартылган. Куткаруучулар барган учурда көлгө эч ким чөкпөгөндүгү аныкталган.

Шамалдын кесепетинен көл үстүндө кайыкта 2006-жылы туулган Э.А. аттуу кыз калып калган. Куткаруучулар аталган кызды жээкке алып чыгышкан. Абалы жакшы.

Автор: Азат Бейшенбеков