Ошто студент кызды өлтүрүп, короого көмүп койгон окуя: Айыпталуучуга карата сот чечими чыкты

Ош облусунун Кара-Суу районунда сүйлөшкөн кызын бычактап, сөөгүн үйүнүн жанына көмүп койгон 24 жаштагы жаранга карата сот өкүм чыгарды. Бул тууралуу облустук соттун маалымат кызматынан билдиришти.

Кара-Суу райондук сотунун чечимине ылайык, айыпталуучу Кылмыш-Жаза кодексинин 122-беренесинин 2-бөлүмүнүн 2,7-пункттары (өзгөчө мыкаачылык менен адам өлтүрүү) менен Н.А. күнөөлүү деп табылып, үй мүлкүн конфискациялоо менен 15 жылга эркиндигинен ажыратылды.

"Чечим кечээ, 28-июлда кабыл алынды. Жазасын жалпы тартиптеги түзөтүү абактарында өтөөсү белгиленди, бөгөт коюу чарасы мурункудай камакта калтырылды. Өкүмгө нааразы тарап Ош облустук сотуна апелляциялык даттанууга укуктуу", - деп билдиришти соттон.

Маалымат үчүн:

2022-жылдын февраль айында Ошто дайынсыз жоголгон 4-курстагы студент кыздын жансыз денеси табылган. Ал киши колдуу каза болгону аныкталып, шектүү катары Ноокат районунун 1998-жылы туулган тургуну, ОшМУнун 4-курсунун студенти Н.А. качып жүргөн жеринен кармалган. Ал көрсөтмөсүндө аш бычак менен кызды сайгылап өлтүрүп алганын, андан соң үйдүн жанына көмүп койгонун айткан.

Автор: Айжанар Рыспек кызы