Тайвань Кытайдын коркутууларына жооп берди

Кытай Тайвандын айланасындагы машыгуулары аркылуу аймактык стабилдүүлүк менен тынчтыкты бузуп, өзүнүн куралдуу күчтөрүн уятсыздык менен колдонуп жатат. Бул тууралуу Тайвандын премьер-министри Су Чжэньчан айтканын чет элдик басылмалар жазышты.

Саясатчы Пекинди аскердик мүмкүнчүлүктөрүн көрсөтүүнү токтотууга чакырды. Анын айтымында, Тайбэй Пекиндин кысымына жана аралдын тургундарын коркутуу аракетине багынбайт.

"Кытай аймактык тынчтыкты жана стабилдүүлүктү бузуу үчүн аскерий аракеттерди жасады. Биз эч качан кысымга алдырбайбыз. Биз эркиндикти жана демократияны колдойбуз. Тайвандыктар Кытайдын коркутуп-үркүткөнүн жактырбайт", - деген Су Чжэньчан.

Ал белгилегендей, Кытай аралдын айланасындагы аскердик машыгууларын токтотушу керек, анткени мындан Тайвань эле эмес, башка мамлекеттер да жапа чегүүдө.

"Тайвань жапа чеккен жалгыз өлкө эмес. Коңшу өлкөлөр да катуу нааразычылыгын билдирип, АКШ сыяктуу эркиндикти сүйгөн жана демократиялык өлкөлөр муну катуу айыпташты", - деген Тайвань өкмөтүнүн башчысы.

Пекин өз аймагынын бир бөлүгү деп эсептеген Тайвандын айланасындагы кырдаал АКШ Конгрессинин Өкүлдөр палатасынын спикери Нэнси Пелосинин Тайбэйге жасаган иш сапарынан кийин кескин курчуп кетти. Саясатчы талаштуу аралга Кытайдын каршылыгына карабай барган. Пелосинин сапарына жооп иретинде Пекин Тайвань аймагында чоң масштабдагы аскердик машыгууларды баштаган.

Автор: Азат Бейшенбеков