Муфтият Кадамжайда мыкаачылык менен өлтүрүлгөн окуучу кыздын жакындарына көңүл айтты

Өлкөдөгү мечиттерде зордук-зомбулуктардын алдын алуу жаатында баяндамалар жасалат. Бул тууралуу Кыргызстан мусулмандарынын дин башкармалыгынын басма сөз кызматынан билдиришти.

"Баткен облусунун Кадамжай районундагы өспүрүм кыздын мыкаачылык менен өмүрүнүн кыйылышы боюнча Кыргызстан мусулмандарынын дин башкармалыгы өлкө аймагындагы мечиттерде бешим жана шам намазынан кийин балдардын тарбиясы, ыймандын жана адеп-ахлак, зынаанын шарияттагы орду, адам өмүрүнө кол салуунун кесепети, өспүрүмдөргө карата зордук-зомбулуктардын алдын алуу жаатында баяндамалар жасалмакчы.

Кыргызстан мусулмандарынын дин башкармалыгынын эмгек жамааты Кадамжай районунун Халмион айыл аймагынын тургуну, маркум бир тууганыбыздын ата-энесине жана тууган-уруктарына терең кайгыруу менен көңүл айтат", - деп билдиришти Муфтияттан.

Эске салсак, 4-сентябрь күнү Баткен облусунун Кадамжай районунун Ноогардан айылында саат 15:25 чамасында сел өтүүчү тоннелдин ичинде колу артка жип менен байланган, моюнунан жип менен муунтулуп киши колдуу өлтүрүлгөн кыздын жансыз денеси табылган. Кылмышка шектүү катары Кадамжай районунун Халмион айыл аймагынын 3 тургуну кармалып, убактылуу кармоочу жайга киргизилген.

Автор: Азат Бейшенбеков