Барак Обамага iPhone көтөрүүгө тыюу салынды

АКШ президенти Барак Обама Американын коопсуздук кызматтары iPhone колдонууга тыюу салышканын билдирди. Бул тууралуу бүгүн, 5-декабрда чет элдик маалымат каражаттары жазып чыккан.

Маалыматка караганда, атайын кызматтын адамдары аталган аппараттын электрондук каракчыларга каршы коргонуу мүмкүнчүлүгү төмөнүрөөк болгондон улам президентке iPhone көтөрүүгө уруксат беришкен эмес. Мындай билдирүүнү Барак Обама Ак үйдөгү жыйында тараткан. Ошондой эле президент Саша жана Малия аттуу кыздары көп убактысын Apple компаниясынын смартфондорун колдоноорун кошумчалаган.

Азыркы тапта Барак Обама Blackberry үлгүсүндөгү телефон көтөрөт. Бул байланыш каражаты абдан көп татаалдыктарды жаратып жатканын президент өз сөзүндө белгилеп өттү. Ал телефондун коопсуздук системдеринин күчтүүлүгүнөн улам катардагы адамдар менен дүйнөдө болуп жаткан окуялар тууралуу баарлаша албай жатканын кабарлады.

Ошондой эле Обама менен иштегендер президенттин электрондук почтасы жогорку кызматтагы адамдардын жана досторунун гана каттарын кабыл аларын маалымдаган.

Автор: Темирбек Матаев