Анкарадагы сейил бакка Чыңгыз Айтматовдун бюсту коюлду (фото)

Түркиянын Анкара шаарында залкар жазуучу Чыңгыз Айтматовдун сейил багы жана бюсту ачылды. Бул тууралуу ТИМдин маалымат кызматынан билдиришти.

Маалыматка ылайык, 8-октябрда Анкара шаарында залкар жазуучу Чыңгыз Айтматов атындагы сейил багынын жана бюстунун ачылыш аземи болуп өттү. Сейил бакка жазуучунун бюсту орнотулуп, анын постаментине Ч.Айтматовдун: "Адамга эң кыйыны – күн сайын адам болуу" деген цитатасы жазылган.

Залкар жазуучунун ысымын алган сейил бактын ачылышына элчи Кубанычбек Өмүралиев жана Чанкая муниципалитетинин мэри Алпер Ташделен куттуктоо кайрылуу жасашты.

Элчи Кубанычбек Өмүралиев өз сөзүндө Түркиянын борбору Анкарада Айтматовдун урматына сейил бак ачылып, ага бюстун орнотулушу жазуучуга жана анын элесине болгон терең урматын ачык ырастоосу гана эмес, ошону менен бирге Кыргыз жана Түрк элдеринин боордоштук алакаларынын символу экенин баса белгиледи.

Ошондой эле Элчи Кубанычбек Өмүралиев Чыңгыз Айтматов Кыргызстанга гана эмес, бүтүндөй түрк дүйнөсүнүн маданиятына зор салым кошкон инсан экенин белгиледи.

Салтанаттуу иш-чарага Түркия Республикасында жайгашкан чет мамлекеттердин дипломатиялык миссияларынын жетекчилери жана өкүлдөрү, министрликтердин жана ведомстволордун, коомдук уюмдардын, илимий чөйрөлөрдүн, бизнес түзүмдөрдүн, массалык маалымат каражаттарынын өкүлдөрү жана Анкара шаарында жашаган Кыргызстандын жарандары катышты.

Автор: Алина Айдарбекова
Фото: ТИМдин басма сөз кызматы