Эне тилге эки мүнөт: Таң кулан өөк болгондо деп кайсы учур айтылат?

"Эне тилге эки мүнөт" рубрикабызда "Таң кулан өөк болгондо", "көңүлү үч көчкөн журттай калуу", "жабылуу кара инген" фразеологизмдеринин маанилерине токтолобуз.

Таң кулан өөк болгондо - Таң атып келе жатканда, үрүл-бүрүлдө. Мисалы: "Таң кылайып сөгүлүп, кулан өөк болгондо" («Манас»).

Көңүлү үч көчкөн журттай калуу - Абдан нааразы болуу, аябай жек көрүү, жаман көрүү, ирээнжүү сезими пайда болуу. Мисалы: "Ысып барган делебем муздап, ойлогон оюм ордунан чыкпай, көңүлүм үч көчкөн журттай калып, үйгө кайтып келдим" (Бөлөкбаев).

Жабылуу кара инген - Көтөрүмдүү, жакшылык-жамандыкка чыдамдуу, токтоо, текебери жок, баарына бирдей мамиле кыла билген кадырман, элге-журтка алымдуу. Мисалы: "Айымкан ургаачынын жабуулуу кара ингени, болуштун зайыбы болсо да боорукер, алгылыктуу мүнөзү менен элге жаккан наабаттуу байбиче" (Бейшеналиев).

Автор: Айжанар Рыспек кызы
Фото: Каныкей Амантаева