Төө-Ашууда жүк ташуучу унаалардын кыймылына чектөө киргизилди

Бишкек-Ош унаа жолунун 81-чакырым бөлүгүндө (Төө-Ашуу, Сосновка) жүк ташуучу унаалардын өтүүсүнө убактылуу чектөөлөр киргизилди. Бул тууралуу Транспорт жана коммуникациялар министрлигинен кабарлашты.

Белгилүү болгондой, мындай чектөө бүгүн, 9-ноябрда эртең мененки саат 7:45тен баштап жасалма тыгындарды болтурбоо максатында коюлган.

"Чектөө аба ырайы жана климаттык шарттар жакшырганга чейин болот. "Кыргызавтожол" мамлекеттик ишканасынын №9 жол тейлөө ишканасы тарабынан Бишкек-Ош унаа жолунда аба ырайынын шартына байланыштуу жолдорду кардан тазалоо жана инерттик материалдар менен толтуруу иштери жүргүзүлүүдө", - деп жазылат маалыматта.

Ошондой эле айдоочуларга жайкы дөңгөлөктөрдү кышкы дөңгөлөккө алмаштырууну, дөңгөлөктөрдүн чынжырчаларын жана күрөктөрүн алып жүрүү сунушталды.

Автор: Айжанар Рыспек кызы
Фото: Интернеттен алынды