Бишкекте "Жаштар жумалыгы" өтүп жатат

Бишкек шаарында билим берүү, креативдүү индустрия, ден соолук темаларына арналган "Жаштар жумалыгы" өтүп жатат. Бул тууралуу Маданият, маалымат, спорт жана жаштар саясаты министрлигинен билдиришти.

Маалым болгондой, аталган иш-чара Кыргызстандын Жаштар күнүнө карата өткөрүлүүдө. Жумалыктын алкагында “Жаштар уюмдарынын жарманкеси” уюштурулуп жатат.

Жаштар жумалыгы ар кандай тематикалык иш-чаралар жана демилгелер аркылуу жаштарга сунушталган мүмкүнчүлүктөр тууралуу маалымат берүү максатында өткөрүлөт.

Белгилей өтсөк, жумалык 12-ноябрга чейин уланмакчы.

Маалымат үчүн: Кыргыз Республикасынын өкмөтүнүн 2002-жылдын 14-январындагы №15 токтому менен 10-ноябрь Кыргыз Республикасынын Жаштар күнү жыл сайын белгиленүүчү майрам катары бекитилген.

Автор: Айжанар Рыспек кызы
Фото: Маданият, маалымат, спорт жана жаштар саясаты министрлиги