Төрт облустагы ички иштер башкармалыгына жаңы жетекчилер дайындалды (тизме)

Нарын, Жалал-Абад, Ош жана Ысык-Көл облустарынын ички иштер башкармалыктарына жаңы жетекчилер дайындалды. Бул тууралуу ИИМдин маалыматында айтылат.

ИИМдин буйругу менен жаңы дайындалган жетекчилер:

Нарын облустук ички иштер башкармалыгынын начальниги болуп Канат Жумагазиев дайындалды. Буга чейин ал Ысык-Көл ОИИБинин начальниги кызматын ээлеп келген;

Жеңиш Абитов Жалал-Абад ОИИБинин начальниги болуп дайындалды. Мурда ал Ош ОИИБнин жектекчиси болгон;

Ош облустук ички иштер башкармалыгынын начальниги болуп Жеңиш Жоробеков дайындалды. Ал мурда ал ИИМдин Экстремизмге жана мыйзамсыз миграцияга каршы аракеттенүү боюнча кызматынын начальниги болчу;

Ысык-Көл облустук ички иштер башкармалыгынын начальниги болуп Орунбай Кочкоров дайындалды. Мурда ал ИИМдин Кылмыш иликтөө башкы башкармалыгынын начальнигинин орун басары кызматын ээлеген.

Ички иштер министри Улан Ниязбеков бүгүн, 28-декабрда онлайн кеңешме өткөрүп, Нарын, Жалал-Абад, Ош, Ысык-Көл облустарынын ички иштер башкармалыктарына дайындалган жаңы жетекчилерди өздүк курамга тааныштырды.

"Өзүңүздөр күбө болгондой, Нарын облусунун Кочкор районунда жана Жалал-Абад облусунун Сузак районунда орун алган жагымсыз окуялардан улам айрым облустук ички иштер башкармалыктарынын жетекчилерин ротациялык түрдөгү дайындоолорду ишке ашырдык. Мекенибиз үчүн, коомчулугубуз үчүн талыкпай күнү-түнү кызмат кылып, жогорку жетишкендиктерге жетүү керектигин белгилейм. Себеби сиздерге чоң ишеним артып, жооптуу кызматты аркалоого жана элге ак ниет кызмат өтөөгө жөнөттүк",- деди Улан Ниязбеков.

Белгилей кетсек, Кочкор районундагы милиция кызматкерлери уюшкан кылмыштуу топтун мүчөлөрүнө чара көрбөгөн окуяга байланыштуу бир катар жетекчилер кызматынан бошотулган.

Автор: Айжанар Рыспек кызы