Кой-Таш окуясында жабыркаган Самат Курманкулов Москвага дарыланууга кетти

Башынан оор жаракат алган Чүй облусунун ички иштер башкы башкармалыгынын мурдагы жетекчиси Самат Курманкулов дарылануу үчүн Москвага кетти. Бул тууралуу депутат Жеңишбек Токторбаев социалдык тармактагы баракчасына жазды.

"21-январда генерал-майор Самат Курманкуловду Москва шаарына Калыбына келтирүү борборуна дарыланганы узатып келдим. Эсен-аман жетип, жакшы дарыланып келсин. Кудайым шыпаа берип, батыраак сакайып кетсин.

Ал эми колдоо көрсөткөн тышкы иштер министри Жээнбек Молдокановичке, Кыргызстандын Орусиядагы элчиси Гүлнара-Клара-Самат айымга жана "Манас" эл аралык аэропортунун жетекчиси Манас Самудиновичке ыраазычылык билдирем!", - деп жазды Токторбаев.

Самат Курманкулов 2019-жылдын 7-августунда Кой-Таштагы атайын операция учурунда оор жаракат алган. Жандандыруу бөлүмүнө түшкөн Курманкуловго Бишкекте эки ирет операция жасалган. Абалы жакшырбагандыктан 12-августта дарылануусун улантуу үчүн аны Москва шаарындагы ооруканага алып кетишкен.

Автор: Азат Бейшенбеков