Марлен Маматалиев баңги каражаттарын сатуу мектептерге чейин жеткенин айтты

Бүгүн, 5-апрелдеги Жогорку Кеңештин жыйынында депутат Марлен Маматалиев баңги каражаттарын сатуу мектептерге чейин жеткенин айтып, бул маселеге тынчсызданды.

Эл өкүлү жакында эле коомчулукта резонанс жараткан “Принцесса Дури” аталышындагы баңгизат саткан интернет-дүкөндү эске салып, бул окуянын бир тарабы гана экенин, мындай көрүнүштөр акыркы убактарда көбөйүп жатканын белгиледи.

"Мектептерде курамында баңгизат бар момпосуйлар, клейлер сатылат экен. Алтургай 8-мартта балдар кыздарга электрондук тамеки белек кылган учурлар бар экен. Ушундай көрүнүштөр мектептерде аябай көп учурап жатат", - деди Маматалиев.

Ошондой эле ал аталган маселе боюнча парламенттик угуу кылууну сунуштап, тийиштүү комитетке поротоколдук тапшырма берди.

Белгилей кетсек, социалдык тармактарга интернет-дүкөндө баңгизат жеткирип иштеп жүрүп алдап кеткен балдарды сабап, кечирим сураттырып жаткан видео тарап, коомчулукта кызуу талкууга алынган. Бул боюнча кылмыш иши козголуп, үч адам кармалды.