"Жоолук салына берсин, бирок чүмкөнбөсүн!" Депутат Мажитова паранжага тыюу салууну сунуштады

Бүгүн, 20-апрелдеги Жогорку Кеңештин жыйынында депутат Шарапаткан Мажитова паранжа кийүүгө тыюу салууну сунуштады.

"Жакында социалдык колдоо боюнча 100 миң сомдук сертификатты тапшыруу үчүн Ошко барганда ушундай окуяга туш болдук. Сертификат алганы келген көпчүлүк аялдар көзүн гана көрсөтүп, кара паранжа кийип келишиптир. Ош шаарында көп экен, бирок Алайда андай жок. Жоолук салына берсин, бирок эмне үчүн ушинтип капкара кылып чүмкөнүп алышат, көзү гана көрүнүп турат", - деди Мажитова.

Ошондой эле ал президенттин парламенттеги өкүлү Алмасбек Абытовго кайрылып, түшүндүрүү иштерин жүргүзүү боюнча муфтиятка тапшырма берип коюуну өтүндү.