Курсан Асанов менен жакындарына байланыштуу сот өкүмү чыкты

Бүгүн, 8-июнда Биринчи Май райондук соту тарабынан ички иштер министринин мурдагы орун басары Курсан Асанов менен анын жакындарына байланыштуу өкүм чыкты.

Маалым болгондой, Курсан Асановго, уулу Мухаммед-Али Асановго, айдоочусу Дайырбек Пайзылда уулу жана өкүл баласы Турсунбек Бейшенбековго байланыштуу сот отуруму болду.

Анда Курсан Асанов менен “Чындык” гезитинин редактору Бейшенбеков мурдагы вице-премьер-министр Жениш Разаков тууралуу жалган маалымат тараткандыгы үчүн күнөөлүү деп табылды. Бирок жоопкерчиликке тартуу убактысы өтүп кеткендиктен эч кандай жаза берилген жок. Ал эми 2019-жылы болгон Кой-Таш окуясы боюнча Асанов толугу менен акталды.

Ошондой эле анын уулу Мухаммед-Али Асанов менен айдоочусу Пайзылда уулунун ишинде да кылмыш курамы жок болгондугуна байланыштуу кылмыш иши токтотулду.

Эске салсак, 2019-жылы Курсан Асановго кызмат абалынан кыянаттык менен пайдаланган деген негизде Аскер прокуратурасы кылмыш ишин козгогон. Кийинчерээк, анын айдоочусу Пайзылда уулу менен өкүл баласы Бейшенбеков кармалып, уулуна издөө жарыяланган болчу.