Бүгүн кыргыз эли залкар жазуучу Чыңгыз Айтматовду эскерүүдө

Бүгүн “Ата-Бейит” мемориалдык комплексиндеги Чыңгыз Айтматовдун эстелигине гүл коюлуп, куран окулду. Жазуучуну эскерүү иш-чарасына Жантөрө Сатыбалдиев, экс-президент Роза Отунбаева, КРнын Президентинин аппарат башчысы Данияр Нарымбаев жана маркумдун үй-бүлөсү, жакындары катышууда.

Чыңгыз Айтматовдун көзү тирүү болгондо бүгүн 85 жашка чыкмак. Жазуучунун мааракесине карата бардык облустарда аны эскерүү иш-чаралары уюштурулат.

Бүгүн Чыңгыз Айтматов окуган азыркы К.И.Скрябин атындагы Кыргыз агрардык университетинде жана кечинде Токтогул Сатылганов атындагы Улуттук филармонияда жазуучуну эскерүү кечеси өтөт.

Эске салсак, Чыңгыз Айтматов 1928-жылы 12-декабрда Таластын Шекер айылында туулган. Ал СССР доорунда эле “Жамийла”, “Саманчынын жолу”, “Гүлсарат”, “Бетме-бет”, “Ак кеме”, “Кылым карытар бир күн”, “Кыямат” сыяктуу мыкты роман-повесттери менен дүйнөгө таанылган. Ал мамлекеттик иштерге да жигердүү катышып, СССРдин Люксембургдагы элчиси болуп кызмат өтөгөн. СССР таркагандан кийин жазуучу Кыргызстандын Бенилюкс өлкөлөрүндөгү элчиси кызматын аркалап келди.

Залкар жазуучу 2008-жылы 10-июнда Германияда дарыланып жаткан жеринен көз жумган. Айтматовдун туулган күнүнүн урматына 12-декабрь Кыргызстанда улуттук адабияттын күнү деп жарыяланган.

Автор: Айпери Ганыжан кызы