Кара-Кулжадагы өрт жалмаган мектептин директору окуянын чоо-жайын айтып берди

Бүгүн, 2-августта Кара-Кулжада өрттөнгөн мектептин директору Баатырбек Кулеков SUPER.KG порталына окуянын чоо-жайын айтып берди.

Анын айтымында, мектептин эскилиги жеткендиктен улам тилсиз жоо имаратка чагылгандай тездик менен жайылган.

"Саат 12лерде өрт чыкканын кызматкерлерден уктум. Усталар иштеп жаткан, алар кеткенден кийин эле өрт чыгыптыр. Кандай болуп өрт чыкканы белгисиз. Өрттөнгөн мектеп эски мектеп болчу. Эки мүнөттүн ичинде эле өрттөнүп, баары түшүп калыптыр. 2015-жылы жаңы мектеп салынсын деген чечим чыккан. 2 жылдан бери өрттөнгөн эски мектептин жанында жаңы мектептин курулуш иштери жүрүп жатат, биринчи кабаты бүткөн. Жакында экинчи кабатын куруп башташат. Кийинки жылдын январь айында колдонууга берилиши керек болчу", - деди Кулеков.

Белгилей кетсек, буга чейин Ош облусундагы Кара-Кулжа районуна караштуу Кайың-Талаа айылындагы Кебек Мамаев атындагы орто мектепте өрт чыкканы кабарланган.

Автор: Айпери Бакталбек кызы