"22 секундда төмөндөп". Пригожиндин учагынын кыйрашынын так графиги жарыяланды

Дүйнө жүзү боюнча учактардын учууларын көзөмөлдөгөн Flightradar24 кызматы кыйроого учураган Евгений Пригожиндин бизнес-учагынын акыркы каттамы боюнча кеңири маалыматты жарыялады.

Flightradar24 кызматынын маалыматына ылайык, Пригожиндин Embraer Legacy 600 учагы Москва убактысы боюнча саат 17:46да өзү тууралуу маалыматтарды бере баштаган. Ал координаттарды берген эмес жана Flightradar24 анын жайгашкан жерин Москва убактысы боюнча саат 17:59дан 18:11ге чейин гана аныктай алган, ал учурда учак Москвадан түндүк-батыш тарапты көздөй алыстаган.

Саат 18:11ге чейин учак 28 000 футка (8,5 километр) чейин көтөрүлүп, андан кийин ушул бийиктикте учкан. Кийинки мүнөттөрдө ал бир аз көтөрүлүп, кайра төмөндөп, саат 18:59дун 52-секундасында учак дароо төмөндөй баштаган.

Кийинки 22 секунд ичинде учак 2 жарым километрге чейин кескин төмөндөп, андан кийин маалымат берген эмес.

Кечээ, 23-августта Евгений Пригожинге таандык болгон учак Орусиянын Тверь облусунун аймагында кулаган. Бортто 10 адам, анын ичинде Евгений Пригожин өзү дагы болгону кабарланды. Борттогулардын бардыгы каза болгон.

Автор: Азат Бейшенбеков