Сокулукта ок атуу менен коштолгон жаңжал боюнча үч адам кармалды

Сокулук районундагы Жаңы-Жер айылында болгон жапырт мушташка катышууга шектелип, үч адам кармалды. Бул тууралуу Чүй облустук милициясынан билдирди.

Алар: 1954-жылы туулган Д.М., 1988-жылы туулган М.М., 1997-жылы туулган М.М. Жаңы-Жер айылындагы 20-хутор аймагынын тургундары болгон. Учурда шектүүлөр убактылуу кармоочу жайга камакка алынган.

Маалымдалгандай, окуяга тиешеси бар айылдын дагы эки тургунуна - Курбангаджи Абдуллаев менен Магомед-Эмин Даудовго издөө жарыяланганын билдирди.

Окуяны иликтөөнүн жүрүшүндө 30дан ашуун адам суракка алынганы кабарланды.

22-сентябрда Жаңы-Жер айылында болгон калайман мушташ маалында атылган октон 69 жаштагы бир киши каза тапкан. Ок тийген дагы бир 37 жаштагы адам ооруканага түшкөн.

Автор: Максуда Кудайбердиева