Бишкектеги эки жашка чейинки балдарга сүт азыктары жана стипендия берилүүдө

Бишкек шаарындагы аз камсыз болгон 3 миңден ашык үй-бүлөгө Биринчи Май райондук социалдык өнүгүү башкармалыгы даректүү колдоо көрсөтүп жатат. Бул тууралуу Социалдык өнүгүү министрлигинин басма сөз кызматы маалымдады.

Маалыматта колдоо көрсөтүлүп жаткан үй-бүлөлөрдүн арасында үч балалуу же андан көп балалуу үй-бүлөлөр, пенсионерлер, ден соолугунун мүмкүнчүлүгү чектелген жана багар-көрөрү жок адамдар бар экендиги айтылат.

"Мындай үй-бүлөлөргө ар кандай түрдөгү социалдык жардамдар берилип жатат. Социалдык жардам катары 2 жашка чейинки балдарга сүт азыктары жана квартал сайын стипендия берилүүдө. Кышкысын мындай үй-бүлөлөр акысыз 1,5 тоннадан көмүр алышат, биз жеткирип барууга дагы көмөктөшөбүз",- дейт Биринчи Май райондук социалдык өнүгүү башкармалыгынын башчысы Чокон Аламанов.

Анын айтымында, башкармалык демөөрчүлөрдү тартыш үчүн активдүү аракеттенүүдө. "Быйыл 400 адам гуманитардык жардам алды. Жалгыз бой пенсионерлер жана ден соолугунун мүмкүнчүлүгү чектелген адамдар дүкөндөр менен кафелерге атайын сүйлөшүү жолу менен тапшырылып жана аларга дайыма ысык тамак берилип турат",- дейт Аламанов.

Автор: Дамира Арстанова