"Ак кула" ат майданынын жер тилкеси аукционго коюлат

Бишкектеги "Ак кула" ипподромунун жер тилкеси аукционго коюлат. Бул тууралуу бүгүн, 3-апрелде Бишкек мэриясы кабарлады.

Маалыматта айтылгандай, аталган ат майданынын аянты 45,73 гектарды түзөт. Ошондой эле тиешелүү чечимди муниципалдык менчикти менчиктештирүү жол-жоболорун ишке ашыруу боюнча комиссия кабыл алынган.

"Көз карандысыз эксперт тарабынан объекттин баштапкы баасы менен белгиленген 8 731 917 000 (сегиз миллиард жети жүз отуз бир миллион тогуз жүз он жети миң) сом өлчөмүндө баалоо жүргүзүлгөн.

Электрондук аукционго катышуу үчүн катышуучу жарыяланган сатуунун баштапкы суммасынан 10 пайыз өлчөмүндө кепилдик төлөмдү төлөшү керек. Аукциондун кадамынын өлчөмү лоттун баштапкы баасынын 20 пайызын түзөт", - деп жазылат маалыматта.

Ага ылайык, мэрия аукциондун жол-жобосу катышуучулар тарабынан баштапкы сатуу баасын “аукциондун кадамына” ылайык суммага ырааттуу жогорулатуу жолу менен жүргүзүлөрүн кошумчалады.