“Супер-Инфо” гезити Өмүрбек Текебаевди – “Жылдын саясатчысы” деп тапты

Кыргызстандагы эң көп нускалуу “Супер-Инфо” гезити жыл жыйынтыгын чыгарып, "Ата Мекен" фракциясынын лидери Өмүрбек Текебаевди “Жылдын саясатчысы” деп тапты.

"Парламентте калкка жага турган сөздөрдү айтып кыйкырып, популизмди жакшы өздөштүрүп алгандар арбын. Алардан айырмаланган “ата мекенчи” бул жылы кыргыз элинин көйгөйлөрүн иш жүзүндө чечүүчү мыйзам долбоорлордун үстүнөн иштеди. Акыркы 15-20 жылдан бери кыргызстандыктарды ири жана чакан финансылык уюмдардын сүткордугу катуу кыйнап келет. Текебаевдин демилгеси менен ушул тармактын ишмердүүлүгүнө быйыл өзгөртүүлөр киргизилип, насыялардын үстөк пайызы чектелди. Бул мыйзам канчалык сакталат жана жашап кетет, ал өкмөттөн көз каранды.

Аргасыздан кош жарандык алууга мажбур болгон эмгек мигранттарынын эртеңки күнү, өлкөбүзгө кайтып келгендеги укуктары кандай болот? Мына ушул суроону кабыргасынан коюп, кош жарандыгы бар кыргызстандык мигранттар учурда өлкөдө жашап жаткан жарандар менен тең укукта болуш керек, башка өлкөнүн жараны болгонуна карабай алар Кыргызстандан менчик мүлккө ээ болуп, мамлекеттик кызматтарда иштегенге укуктуу болуп, өлкөбүздөгү жарандыгы сакталып калышы керек деген мыйзам долбоорун демилгелеп чыкты.

Коррупционер, чыккынчы жана кызмат абалынан пайдаланган чиновниктер белгилүү бир убакыт өткөн соң жооптон кутулуп кетишчү. Бул жумада Текебаев мыйзам долбоор сунуштап, ага ылайык, мамлекеттик кызыкчылыктарга каршы келген иштери үчүн чиновниктер убакытка шылтап жоопкерчиликтен кутула албай турган болуп калышты.

Мына ушундай ишмердүүлүгү, элдин чыныгы көйгөйлөрүн күрөө тамырдан кармап билгендиги, ал маселелерди чечүүгө конкреттүү аракеттерди кылгандыгы жана саясий көрөгөчтүгү менен өзгөчөлөнгөн парламенттеги “Ата Мекендин” лидери Өмүрбек Текебаев “Жылдын саясатчысы” деп табылды" деп жазылат "Супер-Инфо" гезити тараткан билдирүүдө.

Автор: Дамира Арстанова