"Баарыбыз көрдүк". Акаев парламентте добуш берүүнүн жыйынтыгына нааразычылыгын билдирди (видео)

Бүгүн, 17-апрелдеги Жогорку Кеңештин жыйынында экс-депутат Айбек Осмоновдун ыйгарым укуктары мөөнөтүнөн мурда токтотулгандыгына байланыштуу анын ордуна Түрк мамлекеттеринин парламенттик ассамблеясына Жогорку Кеңештен жаңы мүчө шайланды.

Анда "Альянс" фракциясы депутат Айсулуу Мамашованын, "Ата Журт-Кыргызстан" фракциясы Чынберди Төлөновдун талапкерлигин көрсөттү.

Жабык электрондук добуш берүүнүн жыйынтыгы боюнча Мамашова 44, Төлөнов 46 добуш алды.

Добуш берүүнүн жыйынтыгына "Альянс" фракциясынын лидери Жанар Акаев нааразычылыгын билдирди.

"ТүркПА уюмунда бир гана айымыбыз бар экен. Эки аял болсо деп Мамашованы сунуштадык эле. Бирок залда эмне болуп жатканын баарыбыз көрдүк. Ушул өңдүү өтө принципиалдуу маселелерде анча-мынча азчылык фракцияларга деле берип койсоңор туура болмок. Мейли эми, кийинкилерде дагы көрөбүз", - деди Акаев.

Ага төрага Нурланбек Шакиев бул аргументти добуш берүүгө чейин айтканда, балким, башкача болмок экендигин айтты.

Белгилей кетсек, ТүркПАдагы Жогорку Кеңештин делегациясынын курамына төмөнкүлөр кирет:

Делегациянын төрагасы – Нурланбек Шакиев.

Чолпон Султанбекова ("Ишеним")
Улан Бакасов ("Мекенчил")
Дастан Жумабеков (Манас району)
Русланбек Жакышов ("Ишеним")
Тазабек Икрамов ("Элдик")
Нуржигит Кадырбеков ("Ыйман нуру")
Улан Примов (Алай району)
Чынберди Төлөнов ("Ата Журт-Кыргызстан").