"Коррупционерлерди коргогон жерим жок". Талиева Ататүрк паркындагы үйлөрдү сүрдүрүү туура эмес экенин айтты

Бүгүн, 15-майда Жогорку Кеңештин кезектеги жыйынында депутат Камила Талиева Ататүрк сейил багындагы үйлөрдүн сүрдүрүлүшү боюнча маселени көтөрдү.

Ал парктын аймагындагы үйлөр карапайым адамдардыкы экенин эске салып, бул ишти мэрия кылдат кароо керектигин айтып өттү.

"Акыркы маалымат боюнча, 20-май күнү Ататүрк паркында жайгашып калган 198 үй сүрдүрүлөт деп жатат. Мен коррупционерлерди ныпым коргогон жерим жок. Ошол 198 объектиде биздин жарандар мүмкүн экинчи, үчүнчү же бешинчи колдон сатып алгандыр. Ошол учурдагы мэр, тийиштүү кызматтар, шаардык кеңеш эмне үчүн сот жоопкерчилигине тартылбайт? Жеңил эле ал жерлерди талкалаш керек деген позицияга түшүп албашыбыз керек. Бул маселени этият карайлы, мыйзам деген бар. Бүт баары иликтенсин, мүмкүн, билбей үй алып калган. Балким, аларга салыктын төлөмүн эки эсе көбөйтүп коюш керек, ушул жактарын карасаңыздар. Ким ушуга жол берсе, ошолор жоопкерчиликке тартылсын", - деди эл өкүлү.

Эскерте кетсек, мэрия парктын аймагындагы курулуштарды демонтаждоо жана бузуу иштери 20-майга пландалганын билдирген.