Депутат Калпаев ички каттамдын билет баасы кымбат болуп жатканын айтты

Жогорку Кеңештин депутаты Бактыяр Калпаев Бишкектен Баткенге учак билети кымбат болуп жатканын айтып, аны арзандатууну сунуш кылды. Мындай пикирин эл өкүлү бүгүн, 16-майдагы парламенттин жыйынында билдирди.

Айтымында, бүгүнкү күндө Бишкектен Баткенге учак билетинин баасы 6 миң сом болуп жатат.

"Бүгүнкү күндө авиа тармагында чоң реформалар болуп, жаңы аэропорттор салынып, ошол эле убакытта жаңы учактар сатып алынууда. Бирок бүгүнкү күндө Бишкектен Баткенге учак билети 6 миң сом болуп турат. Бишкектен Аба-Дабиге билеттин баасы 5 миң сом. Абу-Дабиге 5 саат учат, Баткенге болсо 45 мүнөт убакыт учат.

Баткен бүгүнкү күндө өзгөчө статуска ээ. Эң алыскы аймак болуп эсептелет. Ошол себептен ушул баа саясатын кайрадан карап чыгып, билеттин баасын түшүрүп берсек, элибиз ыраазы болот эле", - деди эл өкүлү.