"Бири декретте болсо, башкасы алча терип..." Депутаттар каникулда кайда эс алып, эмне менен алек?

Жогорку Кеңештин депутаттары азыркы тапта жайкы каникулда жүргөн чагы. 27-июнда Жогорку Кеңештин VII чакырылышынын үчүнчү сессиясы расмий түрдө жабык деп жарыяланып, эл өкүлдөрү жайкы эс алууга тараган.

Алар жумушка 1-сентябрда келишет. Ага чейин шайлоочулар менен жолугушат жана эс алышат. Депутаттар каникулда эмне менен алек жана кайда эс алып жатканына кызыгып көрдүк.

Жогорку Кеңештин төрагасы Нурланбек Шакиев менен УКМК төрагасы Камчыбек Ташиев жекшемби күнү Ала-Арча капчыгайында эс алып келишти.

"Жайдын аптабында Ала-Арча капчыгайын аралап... Бийик тоолор, асман тиреген карагайлар, шаркырап аккан суу өзгөчө керемет. Мындай жаратылыш, мындай табият дүйнөдө жок", - деп жазды Шакиев.

Парламенттеги "Ынтымак" фракциясынын лидери Марлен Маматалиев SUPER.KG порталына үй-бүлөсү менен кичи мекени Алайда эс алып жүргөнүн билдирди.

Эл өкүлү эс алуу менен жумушту да айкалыштырып Алай районунда эл менен жолугушуп жатканын белгиледи. Ал аймактагы социалдык-экономикалык көйгөйлөр менен жеринде таанышканын кошумчалады.

Ал эми "Альянс" фракциясынын лидери Жанар Акаев Аксыдагы Кара-Камыш жайлоосуна барып келди.

"Көпкөк көл, таза аба. Анан шаркыратманы жанынан көрсөңөр чынында укмуш. Муздак сууга түштүк. Бирок жолу бир аз начар. Тажрыйбалуу айдоочулар менен барган туура. Франция, Италия, Орусиядан келген туристтер жүрөт. Ички туристтер да толтура. Жолдору оңдолсо, келечекте туристтер агылчу эле жер экен", - деп жазды Акаев.

"Бүтүн Кыргызстан" фракциясынын лидери Исхак Масалиев небереси менен алча терип жүргөн сүрөттөрүн бөлүшүп, быйыл алгачкы ирет мөмө бергенин айткан.

"7 жылдык дарактар. Быйыл биринчи жолу гилас мөмө берди. Бир ой келди, кийинки жылы КамАЗ менен Кадамжайга жөнөтсөмбү, ал жерде кымбат экен", - деп жазган ал.

Депутат Балбак Түлөбаев Суусамыр өрөөнүндө жүргөн сүрөттөрү менен бөлүшүп, кыргыз жерине суктанса, Элдар Абакиров Ысык-Көлдө эс алып жүргөн видеолорун бөлүшкөн.

Ал эми депутат айымдардан Нилуфар Алимжанова Ысык-Көлдө эс алып келгенин айтса, Эльвира Сурабалдиева жакында көлгө барарын билдирди. Аида Исатбек кызы болсо декреттик өргүүдө болгондуктан, чүрпөсү менен үйүндө эле болуп жатканын айтты.