Павел Дуровдун Парижде кармалгандан кийинки алгачкы сүрөттөрү жарыяланды

Франциянын Paris Match басылмасы Telegram мессенжеринин негиздөөчүсү Павел Дуровдун Парижде камакка алынгандан кийинки алгачкы сүрөттөрүн жарыялады.

Сүрөттөрдө Дуров кара кийим, көз айнек жана кепкачан болуп, кыз менен Елисей талаасын бойлоп баскан. Журналисттер Дуровдун жанындагы кыз Юлия Вавилова экенин жазышты. 24 жаштагы орусиялык кызды Дуров менен Казакстан, Кыргызстан жана Азербайжанга болгон сапарында да көрүшкөн.

"Ага коюлган айыптардын оордугуна карабастан, орусиялык ишкер анда эч кандай көйгөй жоктой жүрдү", - деп жазды аталган басылма.

Сүрөттөр 28-августта Дуров беш миллион евро күрөөгө бошотулуп, Франциядан чыгууга тыюу салынгандан кийин тартылганы такталган.

Автор: Азат Бейшенбеков