Кыргызстанда мас абалында унаа айдагандарга 50 миң сомго чейин айып салуу сунушталууда

Кыргызстанда мас абалында унаа айдагандар үчүн жазаны күчөтүү сунушталып жатат. Бул тууралуу коррупцияга каршы аракеттенүү боюнча парламенттик комитетинин жыйынында ИИМдин Жол-кайгуул кызматынын башчысы Талантбек Исаев билдирди.

Анын айтымында, бүгүнкү күндө айыптын өлчөмү 1500-2000 сомго чейин түзөт же айдоочудан айдоо күбөлүгү алынат. "Бул күлкү келтирерлик сумма. Биз аны 50 миң сомго чейин көбөйтүүнү же күбөлүгүн 4 жылга алып салууну сунуштап жатабыз. Бирок талкуу учурунда айып 9 миң сомго төмөндөдү. Мыйзам долбоор азыр Жогорку Кеңештин талкуусунда жатат",- деди Талантбек Исаев өз сөзүндө.

Автор: Дамира Арстанова