Абхазиянын президенти башаламандыкка байланыштуу жарандарына кайрылуу жасады

Абхазиянын президенти Аслан Бжания оппозициянын нааразылык акцияларына байланыштуу мекендештерине кайрылуу жасады.

Бжания өз кайрылуусунда республикадагы кырдаал бийликтин көзөмөлүндө экенин айтып, чагымчыл аракеттерге алдырбоого чакырды.

"Түнү бою республиканын жетекчилиги бул көйгөйдү чечүү менен алек болду. Менин тапшырмам боюнча жолу жабылган Адзюжба айылынын тургундары менен сүйлөшүүлөр болду. Алар түшүнүү менен кабыл алышты.

Урматтуу мекендештер, мен сиздерди сабырдуулукка чакырып, чагымчылдыкка алдырбоого чакырам", - деди Аслан Бжания видео кайрылуусунда.

Эске сала кетсек, Сухумда нааразылык акциялары 11-ноябрдын кечинде Абхазиянын парламенти “Көп функционалдуу комплекстердин укуктук статусун жөнгө салуу жөнүндө” мыйзамды кабыл алгандан кийин башталган. Оппозиция бул келишимди ратификациялоого каршы. Алар бул мыйзам Абхазиядагы батирлерди Орусияга сатуу жөнүндө болуп жатат деп эсептейт.

Абхазиянын Мамлекеттик коопсуздук кызматы парламент имаратынын жанында мушташкан бир нече оппозиционерди кармады. Буга жооп иретинде оппозиция Сухумга баруучу үч көпүрөнү бууп салган. Оппозиция камактагы активисттер бошотулмайынча өтмөк жабыла турганын айтууда.

Белгилей кетсек, Абхазия Закавказьедеги жарым-жартылай таанылган мамлекет, грузин-абхаз жаңжалы учурунда Грузиянын эл аралык таанылган аймагында жарыяланган. Республиканын көз карандысыздыгын беш мамлекет (Орусия, Никарагуа, Венесуэла, Науру жана Сирия) тааныган. Ошол эле учурда БУУнун документтеринде Абхазия Грузиянын аймагы катары каралат.

Автор: Азат Бейшенбеков