Сирияны убактылуу ким башкара тургандыгы белгилүү болду

"Хаят Тахрир аш-Шам" тобунун лидери Абу Мохаммед аль-Жуланинин өнөктөшү Мохаммед аль-Башир Сириянын убактылуу өкмөтүнүн башчылыгына дайындалды. Бул туурасында Al-Jazeera билдиргенин чет элдик басылмалар жазышты.

Маалымдалгандай, Мохаммед аль-Башир буга чейин Идлиб провинциясын башкарып, “Сирияны куткаруу” деп аталган өкмөттү жетектеген. Анын билдирүүсүндө убактылуу өкмөттүн милдети 2025-жылдын 1-мартына чейин уланып, ага чейин мамлекеттик башкаруу маселелерин көзөмөлдөйт.

Белгилей кетсек, Сириялык козголоңчулар ишембиде Дамаскка келип, мамлекеттик телеканалдын башкы кеңсесин басып алышкан. Андан соң Башар Асаддын 24 жылдык авторитардык башкаруусу аяктаганы кабарланган. Бул арада өлкөдөн чыгып кеткен мамлекет башчысы Орусиядан башпаанек алгандыгы айтылган.

Автор: Замира Ниязбекова