Түштүк Кореядагы учак кырсыгы: Өлкөдө жети күндүк аза күтүү жарыяланды

Түштүк Кореяда Муан эл аралык аэропортундагы Boeing 737-800 учагынын кырсыкка учурашына байланыштуу жети күндүк аза күтүү жарыяланды. Бул тууралуу Yonhap агенттиги жазды.

Белгилей кетсек, 29-декабрда Боинг 737-800 учагы Түштүк Кореянын Муан эл аралык аэропортунда конуп жатканда кырсыкка кабылган.

Учакта 175 жүргүнчү жана экипаждын 6 мүчөсү болгон. Жүргүнчүлөрдүн ичинен 173 адам Түштүк Кореянын, дагы экөө Таиланддын жарандары. Учактын ичиндегилердин 82си эркек, 93ү аял, 3 жаштан 78 жашка чейинкилер болгон. Көпчүлүгү 40-60 жаштагылар болгону айтылат.

"Өкмөт бүгүнкү күндөн тарта 4-январды кошкондо жети күнгө созулган улуттук аза күтүү жарыялайт", - деген президенттин милдетин аткаруучу Чхве Сан Мок.

Ошондой эле ал атайын органдар учак кырсыгынын себептерин иликтеп, күнөөлүүлөрдү жакын арада аныктай турганын убадалаган.

Автор: Айжанар Рыспек кызы
Фото: интернеттен алынды