ТИМ депутат Малиевдин Германия элчилигиндеги виза боюнча айткандарына жооп берди

Кыргызстандын Тышкы иштер министрлиги Жогорку Кеңеште айтылган Германиядагы элчилик тууралуу маселеге жооп берди.

Айта кетсек, кечээ, 29-январдагы Жогорку Кеңештин жыйынында депутат Арсланбек Малиев өлкөнүн Германиядагы элчиси Өмүрбек Текебаевди коррупциялык ишке айыптаган. Ал элчилик тарабынан A.Aldoukhova жана U.Ditterbrant аттуу чет өлкөлүк жарандарга виза берүүдө мыйзамсыз аракеттер болгонун билдирген.

ТИМ виза Кыргызстандын мыйзамдарынын алкагында каралып берилгенин айтып, билдирүү таратты.

"Жогоруда аталган жарандар Кыргызстандын визасын алуу үчүн Германиядагы элчилик аркылуу эмес, “Электрондук виза” порталы аркылуу бир нече жолу кайрылышкан. Алардын бардык кайрылуулары Кыргызстандын мыйзамдарынын негизине таянып каралган.

Ошондой эле министрлик депутат Малиевге электрондук виза алуу тартиби, анын баасы жана чет өлкөлүк жарандардын арыздарын кароо мөөнөтү боюнча түшүндүрмө берген", - деп айтылат маалыматта.

Автор: Замира Ниязбекова