Бишкекте милиция кызматкери 23 жаштагы кызды мейманканада зордуктоого шектелүүдө

Милициянын лейтенанты зордуктоого шектелип кармалды. Бул тууралуу маалыматты бүгүн, 10-февралда Бишкек шаардык ички иштер башкы башкармалыгынан тастыктады.

Маалыматка ылайык, 6-февралда милицияга 23 жаштагы кыз арыз менен кайрылган. Ал 5-февралда болжол менен саат 19:30 чамасында Сары-Өзөн көчөсүндө жайгашкан мейманканалардын биринен белгисиз адам коркутуп, эркине каршы зордуктаганын айткан. Факты боюнча Кылмыш-жаза кодексинин 154-беренеси (Зордуктоо) менен кылмыш иши козголгон.

Шаардык милиция бул ишке укук коргоо органынын тийиштиги бар экендигин тактоо үчүн Октябрь райондук ички иштер бөлүмүнүн жетекчилиги менен бирге иш алып барган. Натыйжада шектүү катары Октябрь РИИБинин К.У. аттуу кызматкери кармалып, убактылуу кармоочу жайга киргизилген. Учурда тиешелүү экспертизалар дайындалып, териштирүү иштери жүрүүдө.

Автор: Кылымбек Бейшеев
Фото: Иллюстрациялык сүрөт