Өкмөт башчы тажикстандык кесиптеши менен сүйлөшүүлөрдү өткөрдү

Тажикстандын борбору Дүйшөмбү шаарында Министрлер кабинетинин төрагасы Адылбек Касымалиев менен Тажикстандын премьер-министри Кохир Расулзоданын эки тараптуу кызматташуунун негизги маселелерине арналган кеңейтилген форматтагы жолугушуусу болуп өттү.

Өкмөттүн басма сөз кызматынан билдиргендей, негизги маселелердин бири Кыргызстан, Тажикстан жана Өзбекстандын президенттеринин Хожент шаарында боло турган үч тараптуу жолугушуусуна даярдык көрүү болду.

Өкмөт башчыларынын сүйлөшүүлөрүнүн негизги багыты Кыргызстан менен Тажикстандын ортосундагы соода-экономикалык байланыштарды калыбына келтирүү жана андан ары өнүктүрүү болду. Бул багыттагы кызматташтыкты активдештирүү үчүн тараптар эки өлкөнүн өкмөт башчыларынын төрагалыгы алдында Өкмөттөр аралык кеңешти түзүү мүмкүнчүлүгүн талкуулашты. Ошондой эле маданий-гуманитардык кызматташтыкты мындан ары өнүктүрүүнүн, анын ичинде Кыргызстан менен Тажикстандын элдеринин чыгармачыл мурастарын колдоо жана жайылтуу маанилүүлүгүнө да өзгөчө көңүл бурулду.

Энергетика тармагындагы кызматташуунун келечегин кароодо алар эки өлкөнүн энергетикалык тутумдарын бириктирүүгө, региондо электр энергиясын экспорттоо үчүн жаңы мүмкүнчүлүктөрдү түзүүгө мүмкүндүк берүүчү “CASA-1000” стратегиялык долбоорун ишке ашыруунун маанилүүлүгүн белгилешти. Ошондой эле өнөр жай кооперациясын өнүктүрүү жана өлкөлөр ортосунда үзгүлтүксүз аба жана транспорттук каттамдарды калыбына келтирүү маселелери талкууланды.

Жолугушуунун соңунда тараптар жолугушуунун жыйынтыгы Кыргызстан менен Тажикстандын ортосундагы өнөктөштүк мамилелерди мындан ары да чыңдоого жана өз ара кызыкчылык туудурган бардык тармактарда кызматташууну кеңейтүүгө өбөлгө болоруна ишеним билдирди.

Автор: Бек Оморбеков
Фото: Министрлер кабинетинин басма сөз кызматы