"Акча бөлүштүрүү менен алек". Депутат Транспорт министрлигинин ишин текшерүү үчүн комиссия түзүүнү сунуштады

Бүгүн, 4-мартта Жогорку Кеңештин Транспорт, коммуникациялар, архитектура жана курулуш боюнча комитетинин жыйынында депутат Улугбек Ормонов Транспорт министрлигиндеги кошумча түзүмдөрдүн ишин текшерип чыгуу үчүн жумушчу топ түзүүнү сунуштады.

Жыйында Жол фондуна өзгөртүүлөрдү киргизүү тууралуу мыйзам долбоору каралып жаткан.

"Мамлекеттен бөлүнгөн каражаттын дайыны жок. 2023-жылы Транспорт министрлиги менен келишим түзүп, жумушту аткарып, акчасын ала албай жүргөн ишкерлер бар. Булар болсо мынча чакырым жолду бүтүрдүк деп доклад берип жатышат, а аны бүтүргөн кишилер ар бир кабинеттин эшигин каккылап, "акчамы кимден алам?" деп жүрөт. Жол чарба департаментинин жетекчисинен сурашса, "билбейм, мен "Кыргызавтожолуна" которгом" дейт экен. Кызматкерлер акча бөлүштүрүү менен алек. Каржы министрлигинен бөлүнгөн акчаны "каякка бөлсөк?" деп отурушат", - деди ал.

Жыйынтыгында эл өкүлүнүн сунушу бир добуштан колдоо тапты. Бирок комиссиянын мүчөлөрү комитеттин кийинки отурумунда аныкталмай болду.

Автор: Кылымбек Бейшеев
Фото: Жогорку Кеңештин маалымат кызматы