Аcылбек Жээнбеков Сауд Арабиянын ТИМ башчысынын орун басары Халед бин Сауд бин Халед Аль Сауд менен жолугушту

Жогорку Кеңештин төрагасы Асылбек Жээнбеков 9-январда Сауд Арабия Королдугунун тышкы иштер министринин орун басары Халед бин Сауд бин Халед Аль Сауд баштаган делегация менен жолугушту. Жолугушууда өз ара пайдалуу маселелердин кеңири алкагы, Кыргызстан менен Сауд Арабиянын ортосундагы өнөктөштүк байланыштарды андан ары өркүндөтүү жолдору талкууланды.

Төрага Сауд Арабиясы менен кызматташтык алакаларды арттыруу Кыргызстандын тышкы саясатынын артыкчылыктуу багыттарынын бири экенин айтты. Өткөн жылы Кыргызстанда Сауд Арабиянын Аш-Шура Мажилисинин спикеринин жана айыл чарба министринин иш сапарларынын ийгиликтүү өткөнүн белгиледи.

Бишкек шаарында Араб координациялык тобунун мүчөлөрүнүн катышуусунда экинчи тегерек столду өткөрүүнүн маанилүүлүгүн баса көрсөттү. Эки өлкө ортосундагы маданий-гуманитардык кызматташтык мамилелерин өнүктүрүү зарылчылыгын айтты төрага.

Халед бин Сауд бин Халед Аль Сауд мындан ары да Кыргызстан менен кызматташтык мамилелерди жандандырууга кызыкдар экенин билдирди. “Эки өлкө ортосунда көп ынанымдар боюнча өз ара түшүнүшүү бар, ал Кыргызстан менен Сауд Арабиянын кызматташтык мамилелерин андан ары өөрчүтүүнүн башкы өбөлгөлөрүнүн бири болуп саналат”,- дейт ал.