Курулуш министрлиги кырсыктарды алдын алуучу буйрук чыгарды

Курулуш министрлиги курулуш объектилеринде эмгекти коргоо жана коопсуздук техникасы боюнча талаптарды күчөткөнүн билдирди.

Министрлик тиешелүү буйрук кырсыктарды жана уруксатсыз иш-чараларды болтурбоо максатында кабыл алынганын белгиледи.

Ага ылайык:

Коопсуздук боюнча инструктаждан өтпөгөн жана расмий таризделбеген адамдардын объекттерге кирүүсүнө тыюу салынды;
Курулуш аймагында расмий уруксатсыз иш-чараларды өткөрүүгө тыюу салынды;
Бардык объекттерде өткөрүү режими, жеке коргонуу каражаттары, жардам аптечкалары, инструкциялар жана инструктаж журналдары камсыздалууга тийиш;
Инженерлер, өзгөчө бийиктикте жүргүзүлгөн иштерге көңүл буруп, коопсуздук эрежелерин үзгүлтүксүз текшерип турушу зарыл.

Буйруктун аткарылышын көзөмөлдөө курулуш министринин орун басары Бакай Турдугуловго жүктөлгөн.

Автор: Кылымбек Бейшеев
Фото: Иллюстрациялык сүрөт