Коопсуздук үчүн Бишкекке 4000 видеокамера орнотулушу мүмкүн

Депутат Өмүрбек Текебаев сунуштаган мыйзам долбоору кабыл алынып калса Бишкек шаарындагы коомдук мекемелерге 4000 видеокамера орнотулушу мүмкүн. Демилгечинин айтымында, камералар коюлса шаардагы кылмыштуулук 2 эсе азаят.

"Буга болжол менен 4 миллион сомдой каражат кетет. Коопсуздук үчүн өкмөткө бул көп деле акча эмес. Каражатка жараша камера орнотулуучу жайларды шаардык кеңеш өзү аныктайт. Балким этап менен ишке ашырат",- деди Текебаев. Комитет жыйынында маселе боюнча суроолор көп болду.

Айрым депутаттар видеокамера менен кошо аудиожазуучу жабдууну орнотуу сунушун да айтышты. Буга демилгечи "Анда бири-бирибиз менен көчөдө сүйлөшө албай калабыз го. Кафеге кирсек унчукпай отуруп тамак ичип, унчукпаган бойдон чыгып кетүүгө туура келет",- деп депутаттарды жылмайтты.

Мыйзам долбоору биринчи окууда Мыйзамдуулук, укук тартиби жана кылмыштуулук менен күрөшүү комитетинен колдоо тапты.

Автор: Автандил Добулбеков