Өкмөт башчы: “Каржы министрлигинин мамлекеттик органдарды кошумча каржылоодон баш тартууга укугу бар”

Өткөн жылы КРнын Каржы министрлиги 2012-жылга салыштырмалуу мамлекеттик органдарды каржылоо үчүн республикалык бюджеттен 200 миллион сомго көп каражат бөлгөн. Бул тууралуу аталган мекеменин башчысы Ольга Лаврова 16-январда премьер-министр Жантөрө Сатыбалдиевдин катышуусунда өткөн селектордук жыйында билдирди.

Анын айтымында, кошумча каражат энергетика жана өнөр жай министрлиги, “Кыргыз турак-жай коммуналдык бирикмесине” берилген.

“Дээрлик бардык мекемелер каражатты натыйжасыз пайдаланышат. Ошентсе да Каржы министрлиги 2013-жылы бюджетти үнөмдөөгө жетишти. Каражат эле сурай бербей, ички чыгымдарын карап чыгышсын”,- деди министр.

Өкмөт башчы Жантөрө Сатыбалдиев “Каржы министрлигинин мамлекеттик органдарды кошумча каржылоодон баш тартууга укугу бар. Жыл сайын мекемелердин дебютордук карызы көбөйүүдө. Өзүңөрдүн бюджетиңерди натыйжалуу иштеткиле” деп билдирди.

Автор: Айпери Ганыжан кызы